باس كومەندانتتىڭ مالىمەتىنشە, ەلوردادا جاعداي تولىق باقىلاۋعا الىنعان. قالادا 6 بلوكبەكەت تاۋلىك بويى جۇمىس ىستەيدى.
«وسى قيىن كەزەڭدە ازاماتتار نەمقۇرايلىققا جول بەرمەۋ كەرەك. توتەنشە جاعداي كەزىندە الكوگول ونىمدەرىن ساتۋعا تىيىم سالىنعانىن ەسكە سالعىم كەلەدى. زاڭبۇزۋشىلار انىقتالسا, ليتسەنزياسىنان ايىرۋعا دەيىن قاتاڭ جازالانادى», دەدى ەرجان سادەنوۆ.
قالادا ساعات 23.00-دەن 07.00-گە دەيىن كومەندانتتىق ساعات جالعاسادى. توتەنشە جاعداي رەجيمىنە بايلانىستى قالادا پروفيلاكتيكالىق ءىس-شارالار وتكىزىلىپ, پوليتسيا قىزمەتكەرلەرى تۇرعىن ءۇي ماڭدارىن ارالاپ شىعادى. وسى ۋاقىت ارالىعىندا زاڭسىز ءىس-ارەكەتتەرگە جول بەرگەندەردى جانە كوشى-قون زاڭناماسىن بۇزعانداردى انىقتاۋ ماقساتىندا 4649 تۇرعىن ءۇي مەن 420 حوستەل تەكسەرىلدى. تەكسەرىس بارىسىندا كوشى-قون زاڭناماسىن بۇزعان 1372 ادام انىقتالدى, 38 شەتەلدىك ەلدەن شىعارىلدى. تج رەجيمىن بۇزعانى ءۇشىن قر اقبك 476-بابى بويىنشا 318 ادام اكىمشىلىك جاۋاپكەرشىلىككە تارتىلدى, 30-ى قاماۋعا الىنىپ, 137-ىنە ايىپپۇل سالىندى.
ەلورداداعى جول قاۋىپسىزدىگى دە باقىلاۋعا الىنعان. تج كەزىندە كولىك قۇرالىن ماس كۇيىندە جۇرگىزگەن 10 جۇرگىزۋشى انىقتالدى, بارلىعى سوت شەشىمى بويىنشا قاماۋعا الىندى.
پوليتسيا قىزمەتكەرلەرى بلوكبەكەتتەردى قاتاڭ باقىلايدى. بلوكبەكەتتەر قويىلعان ساتتەن باستاپ تىيىم سالىنعان زاتتاردى انىقتاۋ ءۇشىن 50 مىڭعا جۋىق اۆتوكولىك مۇقيات تەكسەرىلدى. نۇر-سۇلتان قالاسى مەن بلوكبەكەتتەردەن 2 تەگىس ۇڭعىلى «سايگا» مىلتىعى, رگد-5 وقۋ-جاتتىعۋ گراناتاسى, CZvz.27. ماركالى تاپانشا, تراۆماتيكالىق تاپانشا, ساۋىت, وق-دارىلەر, 11 بيت, 5 رەزەڭكە تاياق, 3 كاستەت, 3 تاياق, 3 پىشاق, اەروزول تاپانشا, كىسەن جانە بۇرىش بالونى تاركىلەندى. بارلىق دەرەك بويىنشا تەكسەرىس جۇرگىزىلەتىنى ايتىلدى.
بلوكبەكەتتە ەسىرتكى قۇرالدارىن زاڭسىز ساقتاعان 2 دەرەك انىقتالدى. پوليتسيا قىزمەتكەرلەرى كولىكتى توقتاتىپ, تەكسەرۋ بارىسىندا ۇرلىق جاسادى دەگەن كۇدىكپەن 26 جاستاعى جولاۋشىنى انىقتادى. ول ماۋسىمدا پاۆلوداردا ۇرلىق جاساعانى انىقتالدى. سونداي-اق باسقا كولىكتەن قاراعاندىدا وسىنداي قىلمىس جاساعان 36 جاستاعى جولاۋشى ۇستالدى.
قالالىق كومەنداتۋرا باسشىلىعى كومەندانتتىق ساعاتتى ساقتاۋعا, قوعامدىق ءتارتىپ پەن ازاماتتاردىڭ تىنىشتىعىن بۇزباۋعا شاقىرادى. بارلىق زاڭسىز ارەكەت دەرەۋ توقتاتىلادى.
